الأربعاء، 15 يونيو، 2011

الحلقة العاشرة فلوط افندى فى مداخله تلفزيونيه


فلوط افندى  جالس  يتفرج على النشره بيده كوب الشاى  وبيده الاخرى الشيشه وابنته رشوة بتقوله  يابابى عاوزة اشوف  مسلسل مهند ---- نط فلوط  منتفض  قالها  بابى ايه يابت ايه السفاله دى  جبتى منين الكلمه دى  انا  يتقالى يابا  بابى دى لو سمعتك بتقوليها حااحلقك قرعة زى العيد اللى فات  لما  قولتى لاامك  مامى   قومى يابت اتجرى نادى امك  وافتكرى تقوليلها امه  حسك  عينك اسمعك تقولى الكلام  المايص دا تانى ----------- عيون رشوة احمرت وقالت حاضر يابا بس والنبى عاوزة اشوف مهند  وجريت على المطبخ منادية  يااامه كلمى ابويا عاوزك ------- جت فلوطه بتقوله   ايوة  يافلوط  عاوز حاجه قالها اها نفسى هفانى على كوارع  وكرشه  عاوزك تضبطينى فى اكله حلوة  بس اوعى تجيبى من حلوف الجزار حاجه  انا شاكك ان الكوارع اللى بيبعها دى ملعوب فيها وصحصحى وانتى بتنقيها مش تعملى زى زمان فاكره ياولية  لما قعدتى كل شويه تجيبى لحمه  وتقوليلى شوف اللحمه لونها احمر ازاى واعدنا  سنه نضرب لحمه من الجزار اللى  كنتى بتجيبى منه لحد  مامسكوه بيبيع لحمه حمير وانتى  زى الهبله تقوليى حمار اللحمه ياخد الروح  تتاخد روحك يارب  اكلتينى حمارين لوحدى ---------- ردت فلوطه قالتله ينيلك يافلوط ماانت  لسه فاكر  ياراجل ماانت وقتها كانت فلوسك حرام مش كنت بتبلطج  على لجان الانتخابات وكنت ماشى مع  حمير الحزب الوطنى كنت عاوز ايه لحم غزال -------------- قاطعها قالها استنى النشره بداءت اهيه  المذيع  يقول  مد الحبس الاحتياطى لفتحى سرور 30 يوم وجرانه 30 يوم -----------  فلوط  يضرب كف على كف تقوله مالك  يافلوط  يقولها مش  شايفه ياوليه    نازلين من البوكس  بيغطوهم ازاى بملا يات وجواكت  كانهم  ممسوكين اداب هم  منزلنيهم بلابيبص ولا  مختشيين  ايه القرف دا واى حد تانى كان يتمسك  وش امه يتبرى من كتر التصوير  انا بقى  الموضوع دا مضايقنى اوى  هم ليه  مش  يعرفونا دول بيتحاكموا ازاى وليه مش بيكشفوا وشهم ولا  خلاص بقوا زى الحريم بيلبسوهم طرح وملايات -------- فلوطه تضحك تقوله انا نازله السوق  يقولها طيب مش تنسى  كوارع تكون حلوة وجيبى لى معاكى باكوين معسل مبارك  علشان احطه على الفحم واولع فى امه واعمل دماغ  سرور ويبقى  يومك حبيب  قالتله حاضر ياغالى ومشيت --------------  برنامج  بعد النشرة جايبين محامى صاحب  دعوة  رجوع مبارك للحكم ----------  فلوط  شد  نفس عالى من الشيشه وسمع المحامى بيقول الحاكم الشرعى الى الان هو الرئيس مبارك لاان الدستور فى صفه  فلوط يتيمتم بتقول ايه ياروح امك هو اللى حصل كان  ثوره  ولا  ارتكاريه  دا انت خلتها خل خالص  فلوط بعصبيه  مسك  التليفون  وقعد  ينظر لرقم البرنامج ويتصل مشغول   ------ تليفون البرنامج مشغول ---- مشغول ---- والمحامى يتكلم  ان  مبارك برئ  فجاءه التليفون رن  مذيع البرنامج  مساء الخير مين معانا يافندم ---------------- فلوط  يرد  انا فلوط واحد مصرى  المذيع اهلا  استاذ فلوط حضرتك ليك تعليق ------------- فلوط  معلوم لى تعليق على الحلوف اللى قاعد   قدام  خلئتك دا اللى بيقول  مبارك  اب وليه احترام وهو  لسه رئيس  شرعى  ليه  ياخويا  هو مش كان خلع وطلاق بالتلاته كمان ولا  سى مبارك طالب الشعب  لبيت الطاعه ------- الضيف المحامى يرد  ياستاذ  فلوط لازم يكون فى ديموقراطيه  فى الرد وانا  بستخدم حقى   فى حرية الرئى  فلوط  يقاطعه  بص  ياض الحريه  بتاعتك دى  مش تتطلع على نفوخنا ومش تاكل معانا سكة  مبارك دا  شيخ منصر وانت  لامؤاخذه زى صبى العالمه عاوز تتشهر بلاافيه وخلاص  حاول تشوف ليك سبوبه تاكل منها عيش  بكرامه ومش تبقى دلدول كدا تييييييييييييت  اتقطع الخط المذيع  ---- واضح ان الخط   فى خلل  فلوط  يقوله خلل   ياابن اللئيمه ماشى  انا  بقى  قاعد  وراكم لما اشوف اخرتها ------------- وبعد انتهاء البرنامج يقلب التلفزيون  بعصبيه ------------- حلقه   باليه فلوط  ينظر  لها وهو  سارح واذا باب الشقه  يتفتح  فلوطه راجعه من السوق ترى فلوط يشرب الشيشه وينظر  لراقصات الباليه وهو سرحان ولم يلحظ قدومها  فجائته بتعمل ايه يراجل ايه الهباب اللى بتشوفه دا  --------------- يقولها مالك يوليه وهباب ايه بتقولى على دول هباب  يوليه ياضلاليه ها جبتى الكوارع  ردت عليه كفايه الكوارع اللى انت بتتفرج عليها دى ------------------ وراحه قالبه المحطه على  مصارعه المحترفين وراحت قاعده  بيقولها ايه ياوليه بتشوفى ايه  قالت  بشوف العضلات  ياحسره وانت بقيت عامل  زى عود القصب قعد يضحك  قالها  طيب يلا   علشان تعملى الاكل وانا حااقوم اعسل لى ساعتين  واقوم بعدها اتغدى وانزل اشوف الدنيا فيها ايه  -------------------- يتبع

هناك 4 تعليقات:

rnassar15 يقول...

كوميديا الموقف .... تحفه ... ألف هنا و شفا عليهم الكوارع هههههههههههه

غير معرف يقول...

تحفه حلقه جميله وواقعيه

سمورة يقول...

هههههههههه حلوة المصارعة احسن من الكوارع وفلوط افندى

yasmina يقول...

ههههههههه اكيد الكوارع ليها دور في الحلقة الجاية

حدث خطأ في هذه الأداة