الاثنين، 20 يونيو 2011

الحلقه الثالثة عشر دستور ياأسيادنا وفلوط افندى


خبط على باب  شقة فلوط افندى  ---------  فلوطه  ترد من خلف الباب  صوت  يرد دستور  ياأخوانا انا تفيده   فلوط يقفز  من  على كرسيه  دستور تفيده  مين دى ياوليه  قالتله روح غير هدومك لما  افتح ------------  تدخل  ست  تفيدة   بعد الاحضان والقبلات لست فلوطه  تجلس  بالصاله وهات  يارغى ونميميه على  احوال الشارع  يدخل  فلوط ومعه شيشته  ويلقى التحيه  يقولها ازيك ياست تفيدة وازى جوزك محروس بيه اخباره ايه هو لسه  شغال فى وزاره الزراعة ترد تقوله ايوة ياخويا حايروح فين زى ماهو فى اللى اسمه ابصر ايه الارشاد الزراعى ---------  يبحلق فلوط يقولها ارشاد ايه بس  ياست تفيده  فين ايام الزراعة بتاعه زمان كان الخضار ورور وطازة مش  زى الايام دى خضار  كله  صناعى كان النفر مننا يركب القطار وهو رايح اسكندريه  يشوف الخضره بطول الطريق حاجه تشرح القلب دلوقتى ماعدتش فى خضره  الكل بقى يبنى على الارض الزراعيه وبقى خضار يسد النفس  ومن  وقت المقصوف  على رقبته اللى مايتسمى  يوسف فالى  اقصد يوسف  والى  بتاع الفراولة اللى  ابتدى مع ولاد الكلاب   يدخلوا السرطان فى الزراعة وسممو جتتنا  قومى ياوليه هاتى حاجه  نقرقضها  من التلاجة  واحنا بنرغى  قامت فلوطه احضرت طبق  فيها  كابوتشا  خضراء   وخيار  ------------ يرد فلوط يقولها ايه دا ياوليه  تقوله دى كابوتشا يقولها ايه  افوتشا دى ياوليه  صينى دى ولا ايه  انا قولتلك  تجيبى من السوق خس  قالتله  ست تفيده ماهو يافلوط افندى ماعدش زى زمان  خس  ولا فجل ولا  كورات  بقى فى  كابوتشا موده  --------- يرد  مودة مودة  موده ايه ياوليه منك ليها هو ايه بيجرى فى البلد دى لا خضره  عارفين ناكلها زى زمان ولا حتى الخيار دى ليه طعم ويضغط على زر التلفزيون وفى يده  قطعه خيار  يقضمها واذا بالنشرة يتحدثوا عن  وباء  بالخيار  ينظر اللى الخياراية وينظر الى فلوطة يقولها وكمان  عاوزة تعملى لى تسمم  ياوليه ويجرى يرمى قطعه الخيار ويتمضمض  ويقول لها لو البتاع دخل بيتى تانى تبقى طالق انا مش ناقص  جنان  ------------  الست تفيده  تقول دستور استاذن  انا  يقولها استنى  ياست تفيدة ايه موضوع دستور معاكى دا  شكلك هارشه  حاجة  انتى سمعتى حاجه  عن الدستور تقوله دستور ايه ياخويا  هو كلمه دستور دى فيها حاجه ---------------  يحمر  عنيه ويقولها نعم ياختى  دى فيها كل حاجه دى كلمه السر اليومين دول تعرفى ايه عن  الدستور  ياست تفيده وانتى ياوليه تعرفى ايه عن الدستور ترد فلوطة تقوله والله  يافلوط انا  سامعه كل  شويه فى التلفزيون يئولوا دستور دستور وفى ناس تقول الدستور قبل وناس تقول الدستور بعد ترد تفيده تقول هو ايه  ياختى دا  هو بقى دواء   ولا ايه يرد  يقولهم ربنا ياخدكم نساوين  عديمة الفهم الدستور دا اللى بينظم البلد زى كدا ياوليه لما بقولك  نظامى فى البيت تعملى كدا وكدا ومش تعملى دا ولو  عملتى دا  تبقى طالق  فاسده  دا  بقى الدستور اللى بيفهم العباد  ليهم ايه وعليهم ايه  هو انت ياست تفيده انت والمحروس جوزك مش نزلتوا الاستفتا  قالت ايوة ياخويا نزلت وحمرنا  صوباعنا   قالها  حلو اوى   نزلتوا عملتوا ايه قولتوا  نعم ولا لاء  قالت  ليه ياخويا قولنا نعم طبعا  قالها طيب ليه قولتى نعم  قالتله هو انا عارفة انا لقيتهم بيقولوا اللى حايقول لاء حايدخل النار واللى يقول  نعم حايبقى ابن حلال -----------------  رد وقالها   قالها وانتوا فين امخاخكم  ياوليه  انتى وجوزك  مش  لازم نسمع الا  صوت دماغنا ونفهم الصح مش اى  بنى ادم يقول  حاجه تصدقيها   ماتفهموا بئه الثوره قامت علشان الناس مش تبقى تحت رحمه  حد وكل واحد  يشوف الصح ويقوله  لو   لا  كانت صح  قولى لا  واللى حايقولك تدخلى النار يبقى دا   هلفوت  هو  يعنى فى اديه مفتاح الجنه والنار ايه القرف دا -------  لازم ياعالم تفهموا وتعرفوا مصلحتكم ومصلحه البلد  واللى مش  فاهم يسئل مره واتنين ومليون ويسمع  ويفهم  هو انتوا اتولدتوا حصاوى وحاتموتوا حمير  ماتفهموا  بئه  ياعالم  --------------- ردت  تفيده  قالتله قولى يافلوط افندى انت ناوى ترشح مين للرياسة ----------  قالها  لازم الاول اسمع كل واحد  ايه  نظامه وناوى يعمل ايه واللى نظامه  حايدخل جمجتى واحس انه كلامه مضبوط وناوى يعمل حاجه صح حاارشحه  لكن لحد دلوئتى ماحدش  قال  كلمة موزونه كله كلام انشاء وانا  مش بقيت اكل  من الكلام دا انا عاوز واحد دكر يقول الخلاصه  حااعمل كيت وكيت وكيت  وحانفذه  فى خلال اد كدا  يعنى زى الصنايعى لما تديه  طريحه او مرمه  يقولك حااعملها   كدا كدا واخلصها   يوم كدا --  وبصراحه البلد دى عاوزة  دكر واحد يكون ابن بلد وراجل   ادينا لسه  بنشوف
--------------- وانتى وجوزك ناوين ترشحوا مين  قالتوا لسه  والله بس   جوزى بيشجع ابو تريكه  يمكن نرشحه  عين فلوطه طلعت شرار  قالها أبو تريكة  انتى طالق  ياوليه   -------------------- ردت فلوطه وبتضحك  قالتله  يانيلك  هى مراتك  علشان تطلقها  معلش  ياست  تفيده هو   بيهزر معاكى رد فلوط  قالها  ياست تفيدة  شغلوا دمامغكم ابوس اديكم وسيبوكوم من المسلسلات وافهموا البلد رايحه فين والله يكون فى عون جوزك وقعد يتمتم  ويقول فى ناس اتولدت حصاوى وحاتموت  حمار ----- ومن هنا ورايح ممنوع دخول الخيار -------------------------- يتبع

هناك 3 تعليقات:

غير معرف يقول...

للاسف اللى زى تفيده وجوزها كتير وخطرهم على مستقبل مصر اكبر من حطر اعوان مبارك يارب احفظ مصر من الجهل والتحلف

غير معرف يقول...

ترى اين ذهب فلوط افندى هل ذهب الى الصعيد كما وعد ام الى ميدان مصطفى محمود ليرى مايحدث هناك فى انتظارك فلوط افندى

yasmina يقول...

حزب الكنبه

جميلة يا نادر